US-ah Covid-19 test mtd 50 chuang nei tawh

US president Donald Trump chuan an ram chu Covid-19 test  nei tam ber a ni tih sawiin, maktaduai 50 chuang test an nei tawh a, India-in test neih lam tamah a dawt a ni tiin a sawi. 

White House-a press conference a neihah he thu hi sawiin, President Trump chuan an rama hripui vanga thite chu an sun tak zet tih a sawi a, anmahni avang hian vaccine pawh siam chhuah a ni ngei dawn a, he  hripui leng mek hi an la hneh ngei dawn a ni tih a sawi. Vaccine siamna tura hmalak meknaah pawh hma an sawn zel tih a sawi bawk. 

US hi khawvela Covid-19 kai tamna leh he hri vanga thi tamna ber ram a la ni chhunzawm zel a ni. Hri kai hmuh chhuah tawh hi maktaduai  3.8 an tling tawh a, hri thihpui hi mi 1,40,000 an chuang tawh bawk a ni. Trump chuan Covid-19 chu  'China virus' tia sawi lehin, natna ngeiawm tak, China aṭanga a chhuah phal miah loh tur kha a ni, a ti. Mahse he hri hian khawvel pum fanin a tibuai mek tawh tih a sawi.  Buaina hi an chingfel dawn a, ramdangte pawh an theih angin an pui zel tih a sawi bawk. President chuan an ram chhunga hmun ṭhenkhatin hri dona kawnga hma an lak ṭhat laiin, hma la ṭha tawkte an la awm tih a sawi. 

Hei vang hian boruak ṭha lo zawk pawh an la hmachhawn thei dawn tih sawiin, America mipuite chu face mask vuah vek turin a ngen nghal a, hei hian hri leng laka invenna atana awmzia a neih ngei thu leh, ram hmangaihna lantirna a nih thu a sawi a ni.