Russia kut aṭangin ram sq km 6,000 kan lalet tawh : Zelenskyy

Ukraine sipaite chuan an ram beitu, Russia sipaite beihlet runpui chu ngawrh takin an kalpui chho mek a, Russia-in an ram a laksakte chu a lalet belh zel tih president Volodymyr Zelenskyy chuan a sawi.

President Zelenskyy sawidanin, an sipaite chuan an ram khawchhak leh chhim lamah September thla chhungin Russia thuneihna hnuaia awm, ram sq km 6,000 chuang an laksak leh tawh tih a sawi.

Russia pawhin Kharkiv region hmar chhak lama khawpui pawimawhte an chan tih a pha lo. Hemi rual hian an sipaite an tawlhkir tir chhan chu Luhansk leh Donetsk region-ah insawrbing an duh vang niin a sawi thung.

Thawhṭanni tlaia thuchah a sawiah, President Zelenskyy chuan "September thla tir aṭanga vawiin thlengin, kan sipaite hian Ukraine khawchhak leh chhim lam territory sq km 6,000 chuang an lalet tawh a, kan hmalakna hi chhunzawm zel a ni," a ti.

Ukraine-in a nawr letnaah hian hma an la chak hle. Kar hmasa Ningani khan President Zelenskyy chuan Ukraine sipaite hian sq km 1,000 an laklet thu te, Pathianni khan a let thum, sq km 3,000 chuang an lak tawh thu a sawi a ni.

Zelenskyy chuan Russia sipaite beihletna kawnga theihtawp chhuahtu, Ukraine sipaite chungah lawmthu sawiin, an sipaite chu 'pasalṭha dik tak', tiin a sawi. Khua an laklette hming erawh a sawilang lo.

Russia sipaite hian Kharkiv region-a khawpui pawimawh, Balakliya, Izyum leh Kupiansk-te chu an chhuahsan a ngaih tur thu an sawi tawh a, tunah chuan he region chhak lama hmun tlemte chauh an thunun tawh a ni.