Tuilian vangin ei tur tlachhamin kan awm : Pakistan PM
Pakistan prime minister Shahbaz Sharif chuan thla enge maw zat an ramin tuilian an tuar avangin eitur lam an tlakchham tawh thu a sawi.
Tuilianin an thlai chinna hmun leh thlai tharte a tichhiat avangin, ei tur tlakchhamna a thlen phah a ni tiin Prime minister chuan Turkey President nena phone-a an inbiaknaah a hrilh. Sorkar chuan tuilian tuarte tan ei tur, puan-in leh thil dang mamawhte a sem zel a ni, a ti bawk.
PM Sharif hian Thawhṭanni zan khan Turkey president Tayyio Erdogan chu phone-a biain, an rama tuilian tuarte ṭanpuina tura Tukey-in ei tur, puan-in leh damdawi, military aircraft 12 leh rel pali bakah Turkish Red Crescent truck hmanga a thawn luh avangin lawmthu a hrilh. International Rescue Committee chuan tuilian hian ram acre maktaduai 3.6 chuanga zaua thlai chinte a tichhe vek niin a sawi.
Sharif chuan ei tur lama harsatna an tawh chho mekah pui turin Turkey hi a ngen leh nghal bawk niin sorkar thuchhuah chuan a tarlang a, hei bakah hian tuilianin thil a tihchhiatte siamṭhat hna thawhna turah pawh thawhpui turin a sawm bawk.
Tuilian tuar, mi nuai 6.6 vel chu relief camp leh makeshift home-ah an la khawsa mek. Pakistan sorkar, sipai, UN agency leh tualchhunga ṭanpuitu pawl hrang hrangte chuan heng mite hi ei tur leh an mamawh dangte an pe a ni.
Kar hmasa thleng khan tuilian hian Pakistan ram hmun thuma ṭhena hmun khat chu a la chim a, heng zingah hian Pakistan rama thlai chinna hmunpui, Punjab province khawchhak lam leh Sundh province chhim lamte pawh an tel. Tuilianin thil a tihchhiat hi US tld 10 hu vel nia sawi a ni a,mahse thuneitu lam chuan a tira an chhut zat aia tam daih hi thil a chhe tawh niin an sawi.
UN agency leh ram hrang hrangte chuan tuilian tuarte tan thlawhtheihna hmangin ṭum 60 vel ṭanpuina an thawn lut tawh. Kar liam ta khan US chuan sipai thlawhtheihna pathum hmangin ei tur a thawn lut leh bawk. Thawhṭanni khan thlawhtheihna dang pathum chu tuliian tuar nasa ber, Sindh province-ah a tir bawk.
September 16 hmain US hian flight 20 hmangin chhawmdawlna hi thawnluh hman a tum a, ṭanpui ngai zualte hnenah pawisa pek an tum thu a sawi bawk a ni.