Bolivia-ah ni 5 chhungin ruang 400 chhar
Bolivia police-te chuan Thawhlehni khan kawtthlerah leh inah ni nga chhungin ruang 400 chuang an chhar tih an tarlang a, ruang chhar zinga 85% chu Covid-19 vang thi a nih an ring bawk.
July 15-20 chhung khan Bolivia-a Cochabamba metropolitan area-ah ruang 191 chhar a ni a, La Paz khuaah ruang 141 chhar leh a nih bakah Santa Cruz khuaah ruang 68 chhar leh a nih thu national police director Coronel Ivan Rojas chuan a sawi.
Heng ruang an chhar 400 chuang zinga 85% te thihna chu Covid-19 vang a nih police-te chuan an ring. Bolivia-ah chuan Santa Cruz khua chu Covid-19 kai tamna ber khua niin, hri kai hi mi 30,000 chuang an awm tawh a ni. Santa Cruz bakah hian La Paz chu hri kai tamna dang a ni bawk a, he khuaah hian hri kai mi 10,000 chuang an awm tawh bawk.
Ruang an hmuh tam berna khua Cochabamba hi Santa Cruz leh La Paz khua tih loh ah chuan Bolivia-a hri kai an tamna a ni bawk, mi 6,000 chuang hri kai hmuh an ni tawh. Bolivia-a Forensic Investigations Institute director Andres Flores chuan April 1 aṭanga July 19 chhung khan damdawi-in niloa thi mi 3,000 chuang a awm thu a sawi. Bolivia-ah hian Covid-19 hri kai mi 62,357 an tling tawh a, heng zinga enkawl dam hi mi 19,290 an ni a, thi hi mi 2,273 an awm tawh a ni.