Kuminah Nobel Banquet nei dawn lo

Nobel Prize ceremony hman zawh hnua hman ṭhin Nobel Banquet chu kumin hian Covid-19 vangin hman theih a ni dawn lo.

Kum 1956 hnua Nobel Banquet hman a nih theih dawn loh ṭum khatna a ni dawn a, December 10-ah hman ṭhin a ni. Kum 1901 a neih ṭan niin, 1923 thleng kha chuan he Banquet hi 'Nobel Dinner' tih a ni ṭhin. He Banquet-ah hian a tlangpuiin mi sawm bik 1,300 vel an kal ṭhin a, mi tam tak kal khawm ṭhinna a nih avangin hri kai darh hlauhthawn thilah ṭhulh tum a nih thu Swedish daily Dagens Nyheter chuan a tarlang a ni. 

Nobel Prize winner erawh puan a ni dawn a, Norwegian Nobel Com­mittee chuan October 9 hian puan a tum a ni. Nobel Banquet hi Sweden-a Stockholm khawpuia Stockholm City Hall-a Blue Hall-ah hman ṭhin a ni a, Nobel Prize sem zawha dinner ei hona hun tia sawi a ni ṭhin.