NKorea-in missile kapchhuak leh
North Korea chuan nimin khan ballistic missile a kap chhuak leh a, Japan hmar lama Hokkaido thliarkar chungah thlawkin km 2,700 vela thui a thlawh hnuah tupuiah a tla a ni. Hei hi kum 2009 hnu lama North Korea missile kahchhuahin Japan ram a thlawh khumna hmasa ber nia sawi a ni.
Nimina missile kahchhuah hi zing lam dar 6-ah North Korea khawpui, Pyongyang bula, Sunan bial aṭanga kahchhuah niin, South Korea chuan a sawi.
Japan public broadcaster NHK chuan missile hi an ram hmartawpa Hokkaido thliarkar chungah a thlawh hnuah hmun thumah puak darhin Cape Erimo khawchhak lam, km 1,180-a hlaa tuipuiah a tla ta niin a sawi. He missile hi NKorea-in Pacific tuifinriat-a US territory, Guam thliarkar kah nana a vauna ang kha nia sawi a ni bawk.
Japan sorkar chuan NKorea missile kahchhuah vang hian mipuite chu fimkhur turin a chah nghal a, mahse he missile hian thil tihchhiat a nei lo niin, NHK chuan a tarlang. Missile hi Japan sipaite chuan lo kahthlak an tum lo nia sawi a ni.
Japan Prime Minister Shinzo Abe chuan an ram chin chung lama missile kahchhuah chu an ram himna atana thil hlauhthawnawm tak a ni tih sawiin, an ngaizam mai dawn lo tih a sawi. NKorea thiltih chuan an chhehvel bial himna leh security pawh a tichhia a ni, a ti.
Shinzo Abe chuan US President Donald Trump nen minute 40 chhung telelphone-a an inbiak thu swiin, NKorea chu a nuclear programme-te titawp tura na zawka nawr an remti tih a sawi. Japan PM chuan NKorea chunga hma lak dan ngaihtuah tura UN urgent meeting ko tura a ngen tur thu a sawi bawk.