Pope Francis-a'n Myanmar leh Bangladesh tlawh dawn

Roman Catholic kohhran hotu, Pope Francis chuan kumin chhungin Myanmar leh Bang­ladesh a tlawh dawn.

Vatican chuan Pope Francis hian November 27-30 chhungin Myanmar tlawhin, November 30-December 2-ah a ṭhenawm Bangladesh ram a tlawh leh dawn niin a sawi. Pope Francis hi pope ni tawh zinga Myanmar ram tlawh hmasa ber tur a ni dawn a, pope hlui Pope John Paul II pawh khan kum 1986 khan Bangladeh a lo tlawh tawh bawk a ni.

Pope Francis chuan Myan­mar rama sakhaw tlem zawk, Rohingya muslim-te beih leh tihhlum an ni ṭhin chu pawi a tih thu Pathianni khan a sawi a, heng harsatna tawkte ṭanpui tur hian mipuite a ngen bawk. Myanmar-a Rakhine state-ah security force-te chuan Rohingya helte lakah beihpui an thlak reng a, kar kalta Zirtawpni leh Inrinni khan security force leh Rohingya-te inbeihnaah mi tam tak an thi a ni. Rohingya-te laka beihpui thlak a nih avang hian an zinga tam tak chu Bangladesh ramah an tlanchhe tawh a ni.