Kabul-a US embassy bulah bomb puak

Afghanistan khawpui, Kabul-a US embassy bulah nimin khan thih­chilh bomb a puak a, mi pali an thi a, midang eng emaw zatin hliam an tuar.

Afghanistan interior ministry thupuangtu, Najib Danish chuan thihchilh bomb tipuaktu hian nimin zing dar 10 vel khan Massoud square-a private bank bulah a bomb pai hi a tipuak niin a sawi. Bomb puak hian Kabul Bank chu a tichhe nual nia sawi a ni. He bank hi sorkar hnathawk leh sipaiten an hlawh an lakna hmunpui ber a ni. Bomb tihpuahna, Massoud Square hi US embassy awmna bial a ni a, dawr leh bank eng emaw zat awm khawmna a ni bawk. Bomb puak hi eng pawl mahin an tih niin an la chhal lo.