Iran-in Syria leh Lebanon-ah missile factory siam : Netanyahu
Israel Prime Minister Benjamin Netanyahu chuan Iran sorkar chuan Syria leh Lebanon-ah missile factory a siam niin a sawi.
Netanyahu chuan Iran chuan Syria ram chu Israel nuaibo a tumna kawnga a sipai hmupui pakhata siamah a puh. Iran sipaite hian Syria tualchhung buaina thleng mekah President Bashar al-Assad-a an thlawp a, Lebanon-a Hezbollah movement an thlawp bawk a ni.
Israel PM hian Jerusalem-a UN Secretary General Antonio Guterres nena an inkawmnaa he thu hi a sawichhuak a ni. Iran-in missile factory a siamna hmun tak chu a sawilang lo a, mahse hei hi Israel chuan a pawmzam thei dawn lo tih a sawi.
UN hotu hian ni thum cham turin Thawhṭanni khan Israel hi a tlawh a, PM Netanyahu bakah President Reuven Rivlin pawh a kawm a ni. President Rivlin chuan UN-a Israel en hranna awm ṭhin chu titawp tura hma la turin a ngen. Guterres hian nimin khan West Bank-ah kalin Palestinian Authority Prime Minister Rami Hamdallah pawh a hmu a, vawiin hian Gaza Strip a tlawh ang.
PM Netanyahu chuan West Bank-a Juda te chenna-in sak chu ṭhiah a ni ngai dawn lo tih a sawi bawk. Thawhṭanni khan Israel-in West Bank a luah champha vawi 50 lawmnaah thu sawiin, West Bank-ah chuan kum khuaa awm tura lut an ni tih a sawi. Juda-te chenna-in hi 1967-a Middle East War laia Israel-in Palestinian ram a lak sak a ni. Israel sorkarin a ram luaha Juda-te chenna-in a sak hi ram hrang hrangte chuan sawiselin, international law kalh niin an sawi a ni.