Hurricane Harvey vangin Houston-ah zan curfew puang
US-a Texas state-a Houston khawpui chuan thlipui na tak, Hurricane Harvey tlehin chhiatna nasa tak a thlen avangin harsatna a tawk mek a, thlipui hian ruahtui a ken tel avangin khawpui chhung chu tuilianin a chim tel bawk.
Thli tleh leh tuilian kaihhnawiha chhiatna thlengah mi 22 an thi tawh a, chin hriat lohin mi eng emaw zat an awm bawk. Chenna-in tam tak a chhia a, mi eng emaw zat chu community centre-ah an khawsa mek a ni.
Houston mayor Sylvester Turner chuan chhiatna an tawh mek chu misualten remchangah hmanga mi rawkna hun atana an hman venthawn thilah zan curfew a puang. Curfew hi an ram huna zanlai aṭanga a tuk zing dar 5 thleng puan a ni a, mahse he curfew hian volunteer leh chhanchhuah hna thawktute a huam tel lo ang. Turner chuan curfew puan chuan pawikhawihna thleng tur tam tak a veng thei dawn niin a sawi.
President Donald Trump chuan Thawhlehni khan Houston hi tlawhin, thlipui Hurricane-in chhiatna a thlen dante a enkual a ni. Houston khawpuia cheng mi sang tel chu tuilianin an in a chim avangin emergency shelter-ah an awm mek.
Hurricane Harvey hi kum 50 chuang hnua Texas-a thlipui tleh na ber a ni a, kar kalta Zirtawpni khan Houston chhimthlan lam, Corpus Christi-ah thlengin, darkar khata km 354-a nain a tleh a ni.
Thawhlehni chawhnu lam thleng khan Houston-a mi maktaduai 4.5 vel chenna, Harris County-a hmun 25-30% vel chu tuilian hian a chim tawh a ni. Thuneitute chuan tuilenna hmun aṭang hian mi 13,000 vel chhanchhuah an ni tih an sawi.