Guatemala court-in President thupek hnawl

Guatemala President Jimmi Morales-a’n an rama UN anti-corrpution mission a hnawhchhuahna chu Constitutional Court-in a hnawlsak.

Kum 2015 inthlan campaign laiin President Morales hian dik lo takin fund a hmang nia sawi a ni a, hemi chungchanga President chhuina hi UN mission hotu Ivan Velasquez chuan a thlawp a, hei vang hian a chungah Morales hi a lungawi lo hle a ni.

Morales chuan Velasquez chu an ram­chhung inrelbawlnaa inrawlha a puh a, an ram chhuahsan turin thupek a tichhuak a ni.

President thupek hi ram hrang hrangten an sawisel a, ram chhungah pawh a thupek duh lohin high level official pariatin an ban phah a, mi pahnih ban an ni bawk. Guatemala-a court sang ber Constitution Court chuan he thupek hi hnawlin, UN mission a thlawp thu a tilang a ni.

Morales hi comic actor hlui a ni a, president atana thlan tlin a nih hma hian politics lamah a inhnamhnawih ngai lo. Kum 2015 president thlanah khan a chuh a, an ram eirukna umbo a tiam a, mite rin loh takin thlan tlin a ni ta a ni.