Israel in sakin remna zawnga hmalakna a tibahlah : UN chief

Israel ram tlawha zin, United Nations Secretary General Antonio Guterres chuan Israel-in Palestinian ram a luaha Juda-te chenna in a sak ṭhin chuan Israel leh Palestinian inkara remna leh muanna zawnga hmalakna a tibalhlah a ni, a ti.

Thawhlehni-a West Bank-a Ramallah khuaa Palestinian Prime Minister Rami Hamdallah nen an inkawm hnua joint press conference an neihah Guterres chuan he thu hi a sawi a ni.

Guterres chuan Israel-in a ram luah a tihtawp chu state pahnih din theihna tur a ni a, hei hi a tih chuan Israel leh Palestine state chu boruak ṭha tak hnuaiah an awm thei dawn a ni, a ti. State pahnih din a nih theihna tura kawng zawnnan inbiakna ngunthluk leh mumal tak neih chhunzawm leh tura a duh thu a sawi bawk.

Hamdallah chuan Israel-in Palestinian rama in a sak avang hian ram pahnih ding tur leh, remna leh muanna siamna tur chu a chhiat phah thei a ni tiin, hemi chungchangah hian Palestinian chu a ngawi reng tawh dawn lo tih a sawi.

Palestinian PM chuan US President Donald Trump chu two state solution chungchangah te, Israel-in Juda te chenna in a sak leh international resolution kalpui chung­changah a ngaihdan dik tak sawi turin a ngen bawk.