UN council-in NKorea chet dan dem

United Nations Security Council chuan North Korea-in Thawhlehni-a Japan ram chunga ballistic missile a kapchhuak chu a dem thu a sawi. NKorea chu missile kapchhuak tawh lo tur leh, nuclear programme a kalpui mek tihtawp nghal turin a tibawk.

UNSC memmber 15-te chuan lungrual taka thu­chhuah siamin, an phut anga NKorea-in hma a lak nghal chu thil pawimawh tak a nih tih an sawi a, ram hrang hrangte chuan UN-in NKorea hrekna a siamte a taka kalpui turin an tibawk.

Council chuan NKorea chungchang chu boruak ṭha tak hnuaiah, inbiakna hmanga chinfel a duh thu a sawi bawk a ni.

Hetih lai hian NKorea ram hotu lu ber, Kim Jong-un chuan nimin khan Pacific tuifinriat lamah ralthuam enchhin chhunzawm zel turin thu a pe nia sawi a ni. Japan ram chunga missile a test chu Pacific operation bul ṭanna chauh a nih thu a sawi.

NKorea missile kahchhuah hian Japan ram hmarlam, Hokkaido thliarkar a thlawh khum hnuah tuipuiah a tla a ni. He thliarkar cheng miputie pawh an chiai hman hle a ni.

North Korea official news agency, KCNA chuan Thawh­lehni-a missile kah­chhuah chu South Korea leh US sipaiten indo nundan an zir ho mek chhan letna a ni tih a sawi a, hei bakah hian kum 1910-a Japan-Korea treaty ziah champha puala kah a nih thu a sawi bawk. He inremna an siam hnuaiah hian Japan sipaite chuan Korean peninsula an luahsak a ni.