Queen Elizabeth kuangin Buckingham Palace a thleng ; Lalnu zinkawng hnuhnung berin hlut a hlawh

Queen Elizabeth II kuang chuan Thawhlehni zan khan London-a Buckingham Palace a thleng a, mi ṭhahnem takin Palace gate bulah an lo hmuak a ni.

Lalnu kuang hi an ram huna Thawhlehni zan khan Edinburg aṭangin London-ah phurh a ni a, lalnu kuang phurtu thlawhtheihnain London a pan lai, a zinkawng hnuhung thlirtu hi mi maktaduai 5 chuang an awm. Chhinchhiah theih chinah thlawhtheihna thlawk lai thlir zuitu ngah ber, most tracked flight a ni.

Flight tracking website Flightradar24 tarlan danin, Queen Elizabeth II kuang phurtu thlawhtheina thlawk lai hi online-ah mi mtd 4.79 velin an en a, nuai 2.5 velin YouTube channel kaltlangin an en bawk.

Company chuan mi mtd 6 dawnin Boeing C17A Globe­master-in Edinburgh airport-a transponder a pan ṭan tirh minute khatna aṭangin an en nghal niin a sawi a, an platform pawhin harsatna a tawh phah hial a ni.

"Lalnu a nihna anga BOAC Argonaut 'Atalanta'-a a zin­chhuahna hmasa ber aṭanga kum 70 liam hnuah, Queen Elizabeth II flight hnuhnung ber hi Flightradar24 chanchina mite ngaihven hlawh ber a ni," tiin Flightradar24 Director of Communications chuan a sawi. An record hmasa, August thlaa US House Speaker Nancy Pelosi-in Taiwan a tlawh ṭuma entu mi mtd 2.2 aiin a let chuangin a entu a ngah zawk a ni, a ti.

Britain lal ni rei thei ber, Queen Elizabeth hi September 8 khan Scotland-a Balmoral-ah a thi a, a vuina hi September 19-ah neih a ni ang.