UN General Assembly session vawi 77-na ṭan

United Nations General Assembly session 77-na chu Thawhlehni khan general assembly president thar Csaba Korosi chuan a hawng.

UN Secretary-General Antonio Guterres chuan hawnna hun hmanah thu sawiin, UN member ramte chu chona hrang hrang awmte hmachhawn tura thawkho ṭha turin a chah. "General Assembly session 76-naa chona tam tak awm kha an la awm reng a ni. Remna leh muanna a awmna tur te, mihring dikna chanvo humhalh leh hmasawnna ngelnghet awmna tura kan thawh mek karah, ram buaina leh sik leh sa inthlak avanga buaina, khawvel huapa financial system buai avanga ram ṭhang mekte harsatna tawh te, retheihna, intluk tlan lohna leh ei tur tlakchhamna, inṭhendarhna leh inrintawk lohna te chu kan hmachhawn mek thung a ni," a ti.

Session chhung hian General Debate bakah, Declaration on the Rights of Persons Belonging to National or Ethnic, Religious and Linguistic Minorities kum 30 tling pualin September 21-ah high-level meeting neih a ni dawn a, September 26-ah International Day for the Total Elimination of Nuclear Weapons chungchangah high-level meeting neih a ni bawk ang.

September 19 hian UN secretary general Guterres chuan inkhawm pawimawh pahnih a koh - Transforming Education Summit leh Sustainable Development Goals Moment neih a ni dawn bawk a ni.