Haiti-a journalist 2-te report an pek laiin thah an ni

Haiti rama journalist pahnihte chu an khawpui, Port-au-Prince-a pawikhawihna thleng report an pek laiin thah an ni tih journalists association leh news outlet-te chuan an sawi.

Reporter pahnihte hi Pathianni khan tun hnaia misual pawlte pawkhawihna thlen fona, Cite Soleil-a report an pek laiin kahhlum an ni a, an ruang hi an hal zui bawk.

Misual kuttuartute hi Ti Jenn Jounalis tana thawk Tayson Latigue, leh FS News Haiti reporter Frantzsen Charles-te an ni. Reporter-te hian Cite Soleil-a pawikhawihna thleng, hmeichhe tleirawl kum 17 mi thihdan chungchang an bawhzui laiin thah an ni tih Haiti-a Association of Independent Journalists thuchhuah chuan a tarlang.

"Journalist-te hian an hna an thawk mai a ni a, dan bawhchhiatna an nei lo," tiin group chuan a sawi. Reporter Dieudonne St-Cyr chuan journalist pasarih te chu gang pahnihin an beih thu leh an zinga reporter panga chu hliam tuar loin an tlanchhuak niin a sawi.

Haiti PM Ariel Henry chuan reporter-te chunga pawikhawihna chuan a ṭhawng takzet tih a sawi. "Râwng taka chetna hi na takin kan dem a, pawi­khawihna tuartu chhungte leh an thawhpuite kan tawrh­pui hle a ni," tiin Thawhṭan zan khan Twitter-ah a sawi.

January thla khan, Haiti journalist pahnih Wilguens Louissaint leh Amady John Wesley-te chu Port-au-Prince daifemah gang rualin an that tawh bawk.. Louissaint leh Wesley-te hi Laboule 12-ah armed group-te hian a nung chungin an hal a ni. Kum 2000 April thla khan, khatih laia reporter lar ber zinga mi Haitian journalist Jean Dominique chu thah niin tun thlengin thah a nih chhan hi chhui chhuah a la ni lo.