Ni 40 inkharkhip vangin Xinjiang mipuite'n eitur tlachham

China ram khawthlang lam, Xinjiang region-ah ni 40 chuang Covid-19 hri leng vanga inkharkhipna khauh tak an kalpui tawh avangin khaw mipuite chuan ei tur an tlachham tawh niin an sawi.

August thla tir lam aṭang khan hri leng vangin Xinjiang region-ah inkharkhipna khauh tak hi an hmang a ni. Ghulja khaw mite chuan rei tak an inkharkhip tawh avanga an fridge ruak vek tawh leh, naupang ei tur mumal nei lo rilṭama awm thlalakte chu social media lamah te an tarlang a ni.

China chuan ‘zero COVID’ policy dan khauh tak a la kalpui zel a, hri darh tur venna atan khua leh veng pumte pawn chhuah khapin a kharkhip a, an ei turte supply-in a khat tawka in test ṭhin turin a ti bawk.

Xinjiang bialah hian inkharkhipna an kalpui ṭantirh chuan hri kai nia rinhlelhte chu damdawite ei luih tirin, mi ṭhenkhat chu manin disinefectant-ten kah an ni. He biala cheng tam tak chuan lockdown hrehawm an tih thu sawi mah se, thuneitute lam an hlauh avangin an dinhmun dik tak erawh an sawichiang duh lo.

Pathianni khan police-te chuan internet kaltlanga Covid-19 hrileng chungchanga thu dik tawk lo thehdarha puh mi pali an man. A pali hian Ghulja-a administrative detention-a ni 5-10 chhung awm tura tih an ni. Thawhṭanni khan ei tur an neih tawh loh avanga chhuak lui a, lockdown puan duh lohna lantirtu mi 600 chuang chu man an ni bawk. Lungawilohna lantirtute hian ei tur tlakchham vanga thi pawh an awm tawh tih an sawi.