Queen Elizabeth kuang hmu turin mipuite km 4 chuang intlar

Britain lal ni rei thei ber, Queen Elizabeth II kuang London thlenpui a nih hnuin Nilaini khan Westminster Hall-ah mipuite tlawh theih tura dah a ni a, hemi ni hian a kuang en tum mipuite chu km li-a thui an intlar hman a ni.

Kum 96 mi nia kar liamta Ningani-a Scotland-a Balmoral castle-a thi, Queen Elizabeth II ruang hi Thawhlehni khan Edinburg aṭangin London-ah phurh thlen a ni a, Buckingham Palace-ah luhpui hmasain, Palace gate bulah mi tam takin ruang hi an lo hmuak a ni.

Nilaini khan Queen ruang hi lal in aṭangin Parliament-a Westminster Hall-ah lak a ni leh a, he hmunah hian karleha vui a nih hma, kar leh Thawhṭanni zing dar 6.30 thleng dah a ni ang.

Westminster Hall pana Queen ruang kalpuinaah hian amah thlaktu, King Charles III hoin lal chhung­kuate chuan an zui a ni. Vui tura a kuang lakchhuah a nih hma chu mipuiten an tlawh theihnan Westminster Hall hi hawn a ni dawn a, lal vengtu sipaite chuan a kuang hi chhun zan zawmin an veng bawk ang.