USD tld 3 hu sumdawnna neituin Khawvel siamṭhatna atan a company hlan

Thawmhnaw leh gear lama sumdawnna, Patagonia neitu kum 83 mi Yvon Chouinard chuan Nilaini khan khawvel siamṭhatna hmanrua atana hman a nih theih nan a company chu charity tan a hlan tih a sawi. A company hlut zawng hi USD tluklehdingawn 3 hu vel niin New York Times chuan a tarlang.

Yvon Chouinard bakah, a nupui leh a fate pahnih chuan Patagonia-a an voting share zawng zawng chu ram leilung hlutna vawnnun zel a nih theihna turin trust in-charge hnenah an hlan thu an sawi bawk.

Patagonia-a nonvoting share-te chu khawvel sik leh sa inthlak zel do letna atan leh, nungcha humhalhna leh enkawlna atan helam kaihhnawih nonprofit hnenah an hlan vek a, company-in hlawkna a neihte chu nonprofit hnenah hlan an ni bawk ang.

"Kan chenna khawvel hi kan shareholder a ni," tiin Chouinard chuan Patagonia website-a open letter a ziahah a tarlang.

Kum 50 liamtaa din, Patagonia hi leilung humhalhna kawngah hma a la chho chak hle a, an thil siamna tana raw material an mamawhte pawh an thlang ulukin, an thil hralhchhuah aṭanga 1% chu kumtin environmental NGO -te hnenah an pe ṭhin. Mahse hei ngawt hi a tawk lo niin Chouinard chuan a ngai a, a company pum hi a hlan ta a ni.

Patagonia hi company angin a la awm zel dawn a, board of directors leh CEO-ten an enkawl dawn a, mahse Chouinard chhungkaw hian company aṭanga sum la tawh loin, trust leh chhamdawl hnathawhte an enkawl ang.