Prince Philip kiangah Queen Elizabeth II phum dawn Lalnu vuinaa ram hruaitu tel turte hming tarlang
Britain lal ni rei thei ber, Queen Elizabeth II chu a pasal, nikum April 9-a thi ta Prince Philip kiangah phum a ni dawn a, Thawhṭanni hian London-a Westminster Abbey-ah chawimawina famkim nen vui a ni dawn tih Buckingham Palace chuan a puang.
Lalnu vuina inkhawm hian darkar khat vel a awh dawn a, a vuinaah hian ram hrang hrang hruaitu leh lalte an tel beisei a ni a, kum tam tak chhunga ram hruaitu punkhawm tamna ber tur nia ngaih a ni.
Vuina inkhawm neihna tur, Westminister Abbey hi mi 2,000 vel ṭhut theihna tur a nih avangin, ram hruaitute bakah anmahni zuitu mi pahnih chin chauh sawm an ni. Politics thil avangin ram ṭhenkhat erawh chu sawm an ni lo.
Queen vuinaa lal tel turte
Europe khawmualpuia lal chhungkua la awmte chuan Queen Elizabeth II vuinaah an tel tur thu an tichiang tawh hlawm. Dutch lal King Willem-Alexander; Queen Maxima leh Crown Princess Beatrix, Belgium lal King Philippe, Norwa lal King Harald V, Monaco lal Prince Albert II, Denmark lalnu Queen Margrethe, Spain lal King Felipe IV leh a pa, King Juan Carlos-te an kal ang.
Japan Emperor Naruhito leh Empress Masako-te chuan kum 2019-a lalna an chan hnua rampawna an zinchhuah hmasakna ber turah lalnu vuinaah hian an kal dawn tih an sawi bawk. Hei hi Japan ram tihdanphung ang lo tak a ni a, an tihdan phungah chuan lalte hi mitthi vuinaah an tel ngai mang lo a ni.
Ram hruaitu kal turte
US president Joe Biden leh a nupui Jill Biden-te chu lalnu vuinaah an kal dawn a, France president Emmanuel Macron pawhin a kal tur thu a tichiang tawh. US leh France president-te hi Britain sorkarin anmahni motor bik hman a phalsak tlemte zingah an tel.
Turkey president Tayyip Erdogan, Brazil president Jair Bolsonaro, Italy president Sergio Mattarella, Germany hotu Frank-Walter Steinmeier, Israel leh South Korea ram hruaitu Isaac Herzog leh Yoon Suk-yeol te pawh an kal dawn.
Britain awpna hnuaia lo awm tawh, Commonwealth ram hrang hrang hruaitute pawhin vuina hun hmang tura an kal tur thu an sawi.
An ram hotu lu ber atana Britain lal pawmtu, Canada, Australia leh New Zealand ram hotu, Justin Trudeau, Anthony Albanese leh Jacinda Ardern-te pawh an kal dawn a ni.
Sawm loh langsar zualte
Russia leh Belarus-te chu lalnu vuinaa tel tura sawm loh langsar zual an ni a, Ukraine an run avanga sawm lo an nih thu British sorkar lam thuchhuak chuan a tarlang.
Russia president Vladimir Putin hi UK-ah zin khapna siamsak ni mekin, Queen vuinaa a kal dawn loh thu pawh hi a lo sawi tawh a ni.
British awpna hnuaia awm ṭhin, Myanmar-a sipai sorkar leh North Korea pawh sawm zingah an tel lo a, sawm an nih loh chhan erawh sawilan a ni lo.