Russia awmpna hnuaia awm ṭhin Ukraine khuaah ruang 440 chuang hmuchhuak

Ukraine thuneitute chuan Russia thuneihna hnuaia awm ṭhin, tunhnaia an laklet leh tak, an ram khawchhak lama Izium khuaah mitthi ruang 440 chuang phumna thlan an hmuchhuak tih an sawi.

Police official-te chuan Ningani khan ruang ṭhahnem tak hi thlan lian tak pakhatah hmuchhuakin, an zinga ṭhenkhatte chu sipai inbeihna leh air strike vanga thi an nih thu an tarlang.

Kharkiv region-a chief police investigator Serhiy Bolvinov chuan mitthi ruangte chu endik an ni dawn tih a sawi. Russia sipaite chuan kar liam ta khan Izium khua hi an chhuahsan a ni.

Ukraine president Volodymyr Zelenskyy chuan Russia chu he thil thlenga mawhphurtuah puhin, kumin February thla tawp lama an ram khawpui, Kyiv khaw dai Bucha-a ruang tam tak an hmuhchhuah ang bawk kha a thleng leh a ni, a ti. "Russia hian an kalna apiangah mitthi ruang an hnutchhiah a, hremna pawh an hmachhawn ngei tur a ni," tiin Zelenskyy chuan a sawi. Russia erawh chuan civil mite emaw war crime thlen zawng emawa beihpui thlak an nih loh thu vawi tam tak an lo sawi tawh thung.