Pakistan-ah tui hri vanga enkawl ngai mi 90,000 chuang awm

Pakistan chhim lama tuilian nasa tak thlengin nghawng a nei chho zel a, nimina sorkar data aṭanga a lan danin ni khatah tui aṭanga natna kai theih hrang hrang vanga enkawl ngai mi 90,000 an awm mek a, thihpui mi 1,500 an awm tawh bawk a ni.

Tuilenna bialah hian malaria, dengue, kaw ṭha lo leh vun lam natna a leng nasa niin sorkar chuan a sawi.

Ningani khan Malaria vei mi 588 leh a vei nia rinhlelh mi 10,604, kawṭhalo hri kai 17,977 leh vun lam natna nei mi 20,064 report an awm. July 1 aṭang khan tuilenna hmuna an sak, field leh mobile hospital-ah dam lo enkawl hi maktaduai 2.3 an awm tawh a ni.

Pakistan rama tuilian hian mi maktaduai 33 dawn a nghawng a, chenna in tam tak len chhiain, thlai chinna ram, kawngpui lei tamtak a tihchhiat bakah, an ran vulhte pawhin an tuar nasa hle. Tuilianin thil a tihchhiat hi USD tld 30 hu a tling tawh niin an chhut.

National Disaster Manage­ment Authority chuan tuilian vang hian mi 1,508 thi tawhin, an zingah hian naupang 536 an tel tih a tarlang.