Vawiinah Queen Elizabeth II vui a ni dawn ; UK-a cinema 100 za chuangin Vuilai an tichhuak dawn

Britain lalnu, Queen Elizabeth II chu vawiin hian ram chawimawina nen vui a ni dawn ta.

Queen vuina hun hman lai hi Britain-a cinema hall 125 chuangah tihchhuah a ni dawn a, hei bakah hian park, square leh cathedral hrang hrangahte a huhoa en theihna tur siam a ni dawn bawk. Cinema hall-ahte hian a thlawn vekin a en theih dawn a ni.

Westminster Abbey-a vuina hun inkhawm leh, a hnua London-a programme dang hmante chu BBC, ITV leh Sky-ten TV-ah live-in an pechhuak dawn tih culture depart­ment thuchhuah chuan a tarlang.

September 8-a kum 96 mi nia thi, Britain lal ni rei thei ber, Queen Elizabeth II vuinaa tel tur hian ram hrang hrang prime minister leh president bakah, ram dang lalte pawhin London an thleng tawh hlawm a ni.

UK sorkar chuan an lalnu vuina ni hi public holiday-ah a lo puang tawh a ni.

Vawiina Queen vuina hun hman hi Britain chanchina thil thleng lian tak, kum 1997-a Princess Diana vuina, kum 2012-a London Olympics leh lal chhungkua inneihna hun hmante aiin thlirtu an tam zawk rin a ni.

Vuina tura lakchhuah a nih hma, tukin zing thleng khan Queen Elizebeth ruang hi Westminster Hall-ah dah a ni a, kar liam ta chhung khan mi sing telin lalnu zahna hlan leh, thlahin a kuang dahna hmun hi an tlawh a ni.

Queen vuina hun hi an ram huna chawhma dar 11-ah, London-ah Westminster Abbey-ah neih a ni dawn a, hei hi kum 1965-a Winston Churchill vui a nih hnuah Britain-a state funeral neih lehna hmasa ber a ni ang.

Vuina inkhawmah hian mi 2,000 chuang an tel dawn a, ram hrang hrang hruaitute sawm an nih laiin, Russia, Belarus leh Afghanistan-te erawh sawm loh zingah an tel.

Dean of Westminster David Hoyle chuan vuina inkhawm hi kaihruaiin, Archbishop of Canterbury Justin Welby chuan thuchah a sawi ang. Prime minister Liz Truss-i'n lalnu uina thu hi a chhiarchhuak dawn bawk a ni.

London police-te chuan lalnu vuina inkhawm thlirtu mipui pungkhawm an tam dawn avangin police an duty tam ber ṭum tur a ni tih an sawi bawk. Kum 2012 Summer Olympics leh kumin June thlaa lalnu lal kum 70 lawmna, Platinum Jubilee lawmna neih ṭuma police duty aiin an tam zawk dawn tih an sawi. Scotland Yard pui turin ram chhung hmun hrang hrang aṭangin officer 2,000 chuang koh an ni bawk.

Queen Elizabeth vuina hmun tur, Westminster Abbey hi kum 1066 aṭang khan Britain lalte lallukhum khumtirna hmun atan hman niin, lal 17 zalhna hmun a ni bawk. Kum 1066 aṭang khan he hmunah hian Edward V leh Edward VIII tih loh, Britain lal dang zawng chu lallukhum khumtir an ni. Queen Elizabeth II lallukhum khumtir a nih khan TV-ah tihchhuah niin, lallukhum khumtir lai khawvel hmuha tihchhuah hmasa ber a ni.

Abbey-ah hian lal chhungkaw inneih ṭum 16 neih a lo ni tawh bawk. Queen Elizabeth II leh a pasal, Prince Philip-te kha he hmunah hian kum 1947 khan a innei a, a tupa, Prince William leh a nupui, Catherine-te pawh kum 2011 khan he hmunah vek hian an innei.

Vuina inkhawm hman zawhah lalnu ruang hi Abbey aṭangin London-a Hyde Park Corner-a Wellington Arch panpui a ni dawn, kalkawng tluanin sipai leh police-te an intlar ang. Kawtthlerah kalpui a nih laiin Big Ben chu minute danah tihrik niin, Hyde Park aṭangin minute tin gun salute pek a ni bawk ang.

Wellington Arch thlen hnuah, a kuang hi State Hearse hmangin a zinkawng a zawh tawpna tur, Windsor Castle panpui a ni ang. St George Chapel-ah hun hmang lehin, he hunah hian mi 800 vel an tel ang. Lalnu lal hun titawpna neih a ni dawn bawk a, a kuang chunga Imperial State Crown bakah orb leh sceptre-te lak thlak a ni ang a, Queen lak aṭangin lallukhum hi lak hran a ni dawn ta a ni. Hun hman zawhah lalnu ruang hi royal vault-ah dah a ni dawn ta a ni.

Queen kuang hi English oak aṭanga siam niin, kum 30 liamtaa an lo siam tawh a ni. A ruang a chhiat harna turin suan(Lead) hmanga thuam a ni tih The Times report chuan a tarlang. Suan hian boruak lo lut tur chu dangin hei hian hnawng a siam har a, hetiang kuang vek hi Prince Philip-a kuangah khan hman a lo ni tawh bawk a ni.