Ropui takin Queen Elizabeth II vui liam a ni ta

Britain lalnu, Queen Elizabeth II chu nimin khan ram chawimawina famkim nen vui liam a ni ta.

September 8-a Scotland-a Balmoral castle-a thi, kum 96 mi Queen hi United Kingdom ram pumah ni 11 sunna hun hman a nih hnuin nimin khan London-a Westminster Abbey-ah ropui takin vui a ni. Kum 1965-a Sir Winston Churchill vui a nih hnuah, Britain-a state funeral neih lehna hmasa ber a ni.

Westminister Abbey-hi Queen Elizabeth-in pasal a neihna hmun leh, Britain lal ni tura lallukhum khumtir a nihna hmun a ni.

Queen vuina inkhawmah hian ram hrang hrang hruaitu - president, prime minister leh ram dang lal chhungkua sawm bikte chu Royal Hospital Chelsea aṭangin bus hmangin Abbey-ah hruai an ni. Ram hruaitu hi 500 vel zet an tel.

Lalnu ruang hi vui a nih hma chu mipuite tlawh theih turin kar liam ta Nilaini aṭang khan Westminster Hall-ah dah a ni a, vui a nih dawnah he hmun aṭang hian gun carriage hmangin Royal Navy-a sailor 142-te chuan Westminster Abbey an panpui a ni. He gun carriage hi kum 1979-a Lord Mounbatten vuina leh, kum 1952-a lalnu pa, King George VI vuinaah khan hman an lo ni tawh bawk.

Queen kuang hi Royal Standard-a tuam a ni a, kuang chungah Imperial State Crown, orb leh sceptre dahin, wreath dah a ni bawk. Wreath siamna atan pangparte hi amah thlaktu, King Charles III- in Buckingham Palace, Clarence House leh Highgrove ami a thlante an ni.

Queen vuina hun hman a nih chhung hian central London chungah drone thlawh khap a ni a, ri bengchheng a awm lohna turin Heathrow Airport-ah thlawhtheihna chetvel dan pawh tihdanglam a ni bawk.

Vuina inkhawm hman zawhah, lalnu zahna leh sunna lantirin ram pumah minute hnih ngawi rengin hun an hmang a ni.

Lalnu vuina inkhawma choir hla sak zingah hian Sam 23 behchhana phuah, kum 1947-a Prince Philip nena an inneih ṭuma an sak a tel a, hei bakah hian lallukhum khumtir a nih dawn puala Ralph Vaughan Williams phuah, Sam 34 behchhana a siam chu an sa bawk. A vuina puala sak tur bika Judith Weir phuah, Sam 42 behchhana a siam leh, Scottish composer Sir James Macmillan-a'n Rom behchhana a siam chu an sa tel bawk a ni. Weir hi kum 2014 khan Queen's Music master atan ruat a lo ni tawh a ni.

Westminster Abbey-a darkar khat vel vuina inkhawm hman a nih hnuin, Queen ruang hi Windsor Castle panpuiin, kawng tluanin mipui tam takin an lo hmuak a ni. An ram hunah chawhma dar 11-ah vuina inkhawm hi neih ṭan ni mah se, mi tam tak chuan an lalnu vui lai thlir tumin kawtthlerah a hma zan aṭangin an lo riahchilh tawh a ni. Windsor Castle-ah hian vuina inkhawm neih leh a ni a, he hunah erawh mi 800 vel chauh an tel tawh thung. Hemi hnu hian a pasal Prince Philip, a nu leh pa leh a laizawnnu te thlan bulah phum a ni ve ta a ni.