Hurricane Harvey : Chhiatna thlenga thi mi 35 tling tawh

US-a Texas state-a Hurricane Harvey tleh leh tuilian avanga thi chu mi 35 an tling tawh a, chin hriat lohin mi 17 a awm mek.

Hurricane Harvey hian ruahtui a ken tel avangin Texas-a Houston khawpui-ah tui a lian nasa hle a, mi 32,000 vel chu sorkarin awm lailawkna tura a buatsaihah an khawsa mek a ni. Thli leh ruah hi Nilaini zan khan a ziaawm deuh a, thli hian Louisiana state lam a pan a ni.

US National Hurricane Center chuan thli tleh hi ziaawm tawh mah se, Houston, Beautmont/Port Arthur leh Louisiana chhimthlan lam bialte harsatna tawh chu a la ziaawm mai dawn lo niin a sawi. Thlipui tleh leh tuilianin Texas state-a thil tihchhiat hlut zawng hi dollar tluklehdingawn75 hu vel nia chhut a ni. He thlipui hi Texas in kum 50 chhunga thlipui a tawrh nat ber a ni.

Texas Governor Greg Abbott chuan Houston khawpui chu tuilian hian kar khat vel a la chim a rin thu a sawi a, kum 2005-a Hurrican Kartina tleh vanga New Orleans-a mi 1,800 an thina leh, 2012-a Superstorm Sandy tleh vang mi New York leh New Jersey-a mi 132 thihna thlen ṭum ai khan tun ṭuma Hurricane Harvey tleh chu tuartu an tam zawk niin a sawi.

Official-te chuan tuilian vang hian chenna in 49,000 a chhia a, heng zinga 1,000 vel chu luahzui tlak lohin an awm niin an tarlang. Tuilian vang hian US oil refinery lian ber, Port Arthur ami chu khar a ni a, hei vang hian gasoline man pawh a sang chho a, fuel supply thlengin a bahlah phah a ni.