Rohingya 16 tuiah tlahlum

Myanmar aṭanga Bangladesh-a tlanchhia, Rohingya muslim zinga mi 16 chu lawng chesual avangin tuipuiah an tlahlum a, an ruang hi Bangladest coastguard-te’n an hmu a, an zingah hian naupang pawh an tel a ni.

Bangladesh official-te chuan Myanmar aṭanga Rohingya tlanchhi an pun zel thu leh, heng mite hian Myanmar leh Bangladesh inri-naa Naf lui chu lawngin an kaltlang a, lui tui hi a khauh avangin chesual an awm fo niin a sawi.

International Organization for Migration chuan Nilaini thleng khan Myanmar-a Rakhine state-a Myanmar security force leh Rohingya pawl inbeihna vanga tlanchhia, Bangladesh rama lut hi mi 18,500 an tling tawh niin a sawi. Hetih lai hian Bangladesh pan tum mi tam tak chu thleng zo loin kawng lakah an thi a ni.

Coast guard official chuan raltlante hian sangha manna lawng hmangin Bangladesh hi an pan ṭhin a, an lawng hi tuipuiah chesualin a let fo niin a sawi.

Bangladesh-ah hian Rohingya raltlan hi nuai li vel an awm mek a, heng mite hi tuipui kam, Cox’s Bazar leh Dhaka-a camp siamah an khawsa mek a ni.