US-in Pakistan ṭanpuina US dollar mtd 225 a pe
US chuan Paksitan sipai ṭanpuina tan US dollar maktaduai 225 a pe niin a sawi.
President Donald Trump chuan kar hmasa khan Pakistan chu Afghanistan-a America mite thattu firfiakte tana hmun him tak nia a lo puh tawh a, firfiak a hum zel chuan Pakistan a sawhkhawk a tuar tur thu pawhin alo vau tawh a ni.
Trump-a kaihhruai sorkar chuan Pakistan sipai puihna tura dollar maktaduai 225 a pek hi escrow account-ah a dah a, mahse he account-a sum dawng tur chuan Pakistan hian firfiakte nuaibo tura na taka hma a lak a ngai niin a sawi. Escrow account a sum dahte hi inremna an lo siam tawhte tihpuitlin a nih chauhin lak theih a ni ang.
President Trump-a’n Pakistan chungchang a sawi hnuah hian Pakistan chuan American official-te nena meeting an neih tur pathum chu an ṭhulh a, Pakistan Foreign Minister Khawaja Asif-a’n US tlawha Secretary of State Rex Tillerson hmuh a tum pawh a ṭhulh bawk a ni. Pakistan National Assembly chuan resolution pass-in, US President leh a senior official-te’n Pakistan chungchang an sawi dan chu hmelma thusawi leh invauna ang mai a nih thu an sawi.
Kum 2016 khan US Congress chuan Pakistan ṭanpuina tur US dollar tluklehdingawn 1.1 pek a lo phalsak tawh a, heng zingah a tam ber dollar mtd 225 chu sipai puihna atan pek a ni ang a, a dang te chu ruihhlo do beihpui thlakna tan te, healthcare lam atante hman a ni ang. US hian kum 2002 aṭang khan Pakistan hi chhawmdawlna, dollar tluklehdingawn 33 chuang a lo pe tawh a ni.