Chhiat tawkte chhawmdawlna Congress-ah dil dawn

US sorkar chuan an rama Hurricane Harvey tleh avanga chhiat tawkte chhawmdawlna tur emergency fund pe turin Congress a dil dawn.

President Donald Trump chuan emergency fund atan hian dollar tluklehding­awn 5.9 a rawt dawn nia sawi a ni.

Hurricane Harvey tuar nasa ber, Texas state chuan thlipui tleh leh tuilianin an state-a chhiatna nasa tak a thlen tuartute chhawmdawlna atan sorkar laipui hnen aṭangin dollar maktaduai 125 chuang an mamawh dawn niin a sawi. Texas-ah hian thlipui leh tuilianin chhiatna a thlena thi hi mi 39 an tling tawh a ni.

President Donald Trump-te nupa chuan Texas hi tlawhin, thli leh tuilianin chhiatna a thlen dante an en a,vawiin hian Texas leh Louisian tlawh leh an tum. Vice President Mike Pence pawhin a tlawh tawh bawk. Pence chuan chhiatna avanga ṭanpui ngai in register hi mi 311,000 an tling tawh tih a sawi a, heng mite chhawm­dawlna tur pekchhuah a nih theih nan Congress-ah member-te chuan lungrual taka an ngenna chuan an thlawp a beisei thu a sawi.

White House chuan President Trump-a’n a mimal pawisa aṭangin chhiat tawkte chhawmdawlna atan hian dollar maktaduai khat a pe dawn tih a sawi bawk.

Thlipui tleh leh tuilian hian chenna-in 100,000 vel a tichhia a, heng zinga ṭhenkhat chu insure loh an ni bawk. Texas sorkar chuan an chenna hmun a him tawk loh avangin mi 779,000-te chu insawn­chhuak turin a hriattir a, heng mite bakah hian midang 980,000 pawhin an in an chhuahsan tawh bawk a ni. US Federal Emergency Management Agency (Fema) chuan an team chuan mi 3,800 chuang an chhanchhuak tawh niin a sawi. Mi 90,000 chuang chu chhawmdawlna pek tura pawm an ni tawh tih a sawi a, hemi rual hian harsatna an tawh denchhen hian mi ṭhenkhat, inspector leh immigration official lemchang a, midangte bum lo tum an awm thu an sawi bawk a, mipuite chu fimkhur turin a chah.