Venezuela-in Luisa Ortega-i chhui zui

Venezuela sorkar chuan prosecutor aṭanga a ban, Luisa Ortega-i chu eiruk thubuaiah a chhui zui.

Luisa Ortega-i thlaktu, Tarek saab chuan ban a nih hnua ramdanga tlanchhia, Ortega-i chuan Orinoco lui bula oil field-a dik lo taka thil tih a nih dante a hre vek a, mahse lo dan tumin eng thil mah a ti lo niin a sawi. Chhui zui a nih chung­chang hi Ortega-i hian a la chhang lo a, amah ngei pawhin Saab hi eiruknaa inhnamhnawihah a lo puh tawh ṭhin a ni.

Prosecutor hlui Ortega-i hi left wing President Nicolas Maduro sawiseltu langsar tak a ni a, president leh a kaihhruai sorkara senior member-te chu eirukna hrang hranga inhnamhnawihah a puh a ni. Mahse a puhna hi sorkar chuan a pha thung a, Orgeta-i chu Vene­zuela sorkar beihna kawngah US thawhpuiah a puh let a ni.

President Maduro-a’n an ram danpui siamṭha tura constituent assembly din a tum avanga president a beih let vangin, sorkar official-te chuan kumin June thla khan Ortega-i hi an ram phatsantuah an lo puh tawh bawk a ni.

Constituent Assembly inthlan a nih hnuah member tharte chuan lungrual takin Ortega-i ban hi an rel a, a aiawh turin President Maduro-a thlawptu Saab chu dah nghal a ni. Ban a nih hnuah Ortega-i hi a pasal nen Aruba thliarkarah an kal nghal a, heta ṭang hian private jet-in Colombia a pan a, Brazil-ah a kal leh a ni.