FARC-in party hming leh logo tur thlang

Colombia-a helpawl lian tak, sorkar nena inremna an siam hnua political party-a inlet zui ta, Revolutionary Armed Forces of Colombia (FARC) chuan an party hming thar tur leh logo tur an puang.

Party hming atan hian FARC tih hming hman chhunzawm a ni a, mahse a lam pumah Alternative Revolutionary Force for the Common People tih a ni thung a, rose senlar chu party symbol atan hman a ni bawk.

FARC hian Colombia sorkar nena inremna an siam hnuah kumin June thla khan an ralthuam te an dahthla a ni. FARC hi Colombia rama helpawl upa ber niin, sorkar lakah kum sawmnga chuang zet an hel hman a ni. Mahse sorkar nena inremna an siam tak avangin an ralthuamte dahin, political party angin an ding zui dawn a ni. Tunkar tir lam khan an pawl palai 1,200 vel chuan party hminga Congress hmasa ber an hmang a ni. Kum 2018 inthlanpuiah pawh chuh an tum a, party palaite hian candidate tur an thlang ang. Inremna an siam angin inthlanpuiah hian FARC tan hian seat eng emaw zat dah a ni ang.