NKorea-in hydrogen bomb enchhin

North Korea chuan nimin zing khan a ṭum rukna atan nuclear ralthuam a enchhin leh.

NKorea official news agency, Korean Central News Agency (KCNA) chuan Pathianni zingah an ram hotu lu ber, Kim Jong-un-a thupekin hydrogen bomb enchhin a nih thu leh, a hlawhtlin thu a sawi. Hydrogen bomb hi atomic bomb aiin a let eng maw zatin a chak a ni.

Pathianni zing khan NKorea chuan a ralthuam enchhin thar ber chungchang hi a tarlang a, advanced nuclear bomb a siam thu leh, hei hi intercontinental ballistic missile (ICBM)-in a phur theih thu a sawi. KCNA chuan Kim Jong-un-a’n ralthuam siam thar a endik lai thlalak a tichhuak bawk a ni.

KCNA chuan hydrogen bomb power chu kilotons eng emaw zatin a siam danglam thei a, high altitude-ah pawh a tihpuah theih niin a sawi. Nuclear ralthuam chu an duh ang zat an siam thei niin a sawi.

North Korea hydrogen bomb test hian lei a nghawr nghing nasa hle nia sawi a ni. KCNA-in nuclear test hlawhtling tak an neih thu a sawi hma hian US Geological Survey chuan nimin zing khan NKorea-ah hian magnitude 6.3-a nain lei a nghawr nghing niin a sawi a, China pawhin a hnuah magnitude 4.6-a nain a nghing niin a sawi ve leh bawk. Japan chuan NKorea rama lir nghing chu nuclear test vang a ni tih a sawi.

Kum 2016 September thla khan NKorea hian a ṭum nga-na atan nuclear test a lo nei tawh a, nimina hydrogen bomb enchhin hi nuclear test a neih hmasak aiin hian a let 9.8 in na zawk niin, state weather agency chuan a sawi bawk.