Los Angeles-in ram kang vangin harsatna tawk
US-a Los Angeles-ah ram kang avangin mi tam tak chu hmun him lamah sawnchhuah an ni.
Los Angeles Mayor Eric Garcetti chuan kar kalta Zirtawpni zan khan khawpui hmarlam dai, Burbank bul tlang chu a kang ṭan a, ram acre 5,000 a zau a kang chhe tawh niin a sawi.
Ram kang vang hian Los Angeles hmarlama biala cheng mi 700 chuang chu insawnchhuah tir an ni tawh. Inrinni khan in pakhat chu a kang a ni. Official-te chuan thli a tleh tel avangin kangmei chhuak hian darh zau zel a hlauhthawnawm niin an sawi bawk.
Kumin chhungin US khawthlang lamah hian ram acre maktaduai 7.1 a zau a kang tawh a, hei hi kum 2016-a ram kangin a tihchhiat aiin 50% velin a zau tawh zawk a ni.
LA mayor chuan ram kang avang hian emergency a puang tawh a, kangmei chhuak ṭhelh hna hi kangṭhelhtu 500 velin an thawk mek a, thawktu dang pek belh turin state thuneitute an ngen bawk. Texas-a thlipui leh tuilian tuarte puih hna thawk tura tirh, Los Angeles firefighter 100 pawh koh kir an ni.