Trump-a’n chhanchhuah hna thawh dan fak

US President Donald Trump chuan Hurricane Harvey tleh leh tuilian avanga harsatna tawk mek, Texas state chu a ṭum hnihna atan a nupui, First Lady Melanie Trump nen kar kalta Inrinni khan an tlawh leh a, harsatna tawkte chhanchhuah leh chhawmdawl hna thawh a nih dan chu a fak hle.

President Trump leh a nupui te hian Texas-a harsatna tawk mek leh chhanchhuah hna thawktute chu an kawm kual bawk. Trump chuan hun khirh tak tawk mah se, hna thawktute hma lak dan chu a ropui hle niin a sawi.

Thlipui tleh leh tuilian avanga mahni in leh lo chhuahsante zinga eng emaw zat chu an in lamah an kir leh tawh a, hetih lai hian hmun tam tak chu tuilianin ala chim reng a ni.

Hurricane Harvey tleh avang hian Texas state-ah mi 47-in nunna an chan tawh a, sorkarin awm lailawkna tur a siamah mi 43,000 vel an khawsa mek bawk. President Trump chuan tuilian tuarte awmna siamte chu tlawhin, mipuite pawhin chhawmdawl hna thawh a nih dan chu ṭha an ti tawk nia a ngaih thu a sawi.

President Trump chuan Texas leh Louisiana state-a thlipui tleh leh tuilian tuarte ṭanpui leh chhawmdawlna pekna atan Congress-ah dollar tluklehdingawn 7.8 a dil tawh bawk. Texas Governor Greg Abbott chuan an state chuan chhawmdawlna dollar tld 125 vel an mamawh dawn niin a sawi bawk.