Iraq-ah IS firfiak 2,000 chuang that tawh

Iraq sipaite chuan an ram khawthlang lam, Tal Afar area-a Islamic State (IS) firfiakte laka beihpui an thlaknaah firfiak 2,000 chuang an that tawh.

Joint Operations Command (JOC) hotu, Lt. Gen. Abdul Amir Yarallah chuan Inrinni-a TV-a thu a sawinaah he thu hi a sawi a, “August 20-31 inkar chhunga beihpui thlaknaa firfiak thi zat chu 2,000 chuang an ni a, suicide bomber 50 chuang an thi bawk a ni”, a ti.

IS firfiakte lak aṭanga Tal Afar bial chhanchhuah tuma beihpui an thlaknaah hian Iraq army, federal polcie leh commando, Rapid Respondse force leh Counter-Terrorism Service (CTS) force bakah paramilitary Hash Shaabi fighter brigate 10 aṭangin mi 40,000 vel an tel a ni. Heng sipaite hi Iraq leh ṭangrual ramte chuan thlawhtheihna hmangin an lo pui reng bawk.

Yarallah chuan ni 12 chhung beihpui thlaknaah hian sipai 115-in nunna an chan a, mi 679-in hliam an tuar bawk niin a sawi. Beihpui an thlak chhung hian sipaite chuan Tal Afar leh a chhehvel bial aṭangin mi 40,758 an sawnchhuak a ni. Tal Afar area hi square km 3,206-a zau n iin, Tal Afar khua bakah khawpui dang pathum Zummar, Mahalbiyah leh Ayadhiyah te a huam tel a ni.