Myanmar army helicopter hmangin School beih a ni, mi 6 an thi

Myanmar sipaite chuan Sagaing region-a Let Yet Kone khuaa school pakhat chu helicopter aṭangin an bei a, naupang paruk an thih bakah, mi dang 17 an hliam.

Sipaite chuan sipai sorkar dodal­tu, helpawlten school hi tawmhimna atana an hmanlaiin an bei niin an sawi.

Mizzima leh Irrawaddy news portal tarlan danin, sipaite hian kar liam ta Zirtawpni khan Buddhist monastery-a school an kap tih sawiin, naupang ṭhenkhat chu a hmunah an thi nghal a, ṭhenkhat erawh chu sipaiten khua an luh hnuin an thi niin an sawi.

Khawchhunga chengte chuan sipaite hian mitthi ruangte hi lain, an khua aṭanga km 11 vela hlaah an phum nghal niin an sawi bawk.

Sipai sorkar chuan he thil thleng chungchangah hian thuchhuah siamin, firfiaka a puan, Kachin Independence Army leh People's Defence Force (PDF)-te chu monastery-ah hian inkhuarin, he khua hi ralthuam tawlhrukna atan an hmang ṭhin niin a sawi. Hei vang hian thil awmdan thlithlai turin helicopter hi an tir a, mahse monastery chhung aṭangin PDF leh KIA-te hian a lo bei hmasa a ni, an ti.

Firfiakte hian an lo beih hmasak vangin sipaite hian an kap let ve a, an inbeihnaah hian khawchhung mi ṭhenkhat thiin, hliam tuarte chu enkawl tura hospital hruai an nih thu an sawi bawk. Firfiak pawlte hian khawchhung mite chu sipaite laka inphenna atan an hmang nia sawiin, an inbeih hnuah handmade bomb 16 an mansak thu sipai thuchhuah chuan a tarlang bawk.

Hetih lai hian democracy thlawptuten civil sorkar aiawh tura an din, National Unity Government (NUG) chuan sipaite chet dan chu an dem thu sawiin, school-te an bei fo tih an sawi. NGU chuan sipaite hian airstrike an neih hnuah zirlai leh zirtirtu 20 vel an man ni a sawiin, heng mite hi chhuah nghal turin an phut thu an sawi.

Non-governmental organisation, Save the Children chuan nikum February thlaa sipaiten civil sorkar thuneihna hnehchhuh a, sorkar an siam hnuah school beihna hi nikum chhung khan ṭum 190 vel a thleng niin a sawi. Hemi rual hian sipai sorkar dodaltu, helpawl leh pawl dang hrang hrangte chuan inkhuarna atan school hi an hman ṭhin avangin naupangte zirna thlengin an tibuai tih a sawi bawk.