Japan-a typhoon Nanmadol tleh vangin mi mtd 9-te insawn chhuak turin hriattir

Japan ramah thlipui tleh na ber zinga mi, super typhoon Nanmadol tlehin chhiatna a thlen vangin mi pahnih an thi tawh a, mi 90 dawn an hliam bawk. Thlipui tleh vang hian mi maktaduai kua vel chu hmun him lama insawnchhuak tura hrilh an ni.

Thlipui hian Pathianni khan Japan chhimtawpa Kyushu thliarkar a nuai a, heta ṭang hian an thliarkar lian ber, Honshu lam a pan leh a ni. Thli tleh vang hian mi sing tel chu emergency shelter-ah awmin, chhungkaw nuai 3.5 dawn eng nei loin an awm bawk.

Inkalpawhna leh sum­dawnna lam thlengin thli tleh hian a nghawng a, tuilian leh leimin thlen hlauhawmin an awm mek bawk a ni.

Bullet train service, ferry leh flight za chuang cancel a ni a, dawr leh sumdawnna hmun dang te pawh khar an ni.

Thlipui hian Kyushu thliar­kar a nuai hnuah khawchhak lam panin, vawiin hian Honshu thliarkar a thlen rin a ni. Japan khawpui, Tokyo-ah chuan ruah nasa taka surin, tuilian vangin Tonzai underground line-te pawh tihtawp rih a ni bawk.

Kagoshima, Miyazkai, Oita, Kumamoto leh Yamaguchi area-ah level-five alert tihchhuah niin; Kyushu, Shikoku leh Chugoku region-ah level four alert tihchhuah a ni bawk. Alert tihchhuahna hmuna cheng, mi maktaduai kua vel chu insawnchhuak turin tih an ni.

US Joint Typhoon Warning Centre (JTWC) chuan Nanma­dol hi super typhoon catergory-ah a dah a, he thli hi 240 km/ hr-a naa tleh chinte an sawina a ni. A tleh nat lam hi hurricane pali/panga tleh nat lam nen intluk vela ngaih a ni bawk.

Thlipui tleh vang hian prime minister Fumio Kishida chuan New York-a zin tur pawh a sawn hla bawk a ni.