Iran-a nawrh huaihawtnaah mi 5 an thi

Iran-a Kurdish biala-a police kuta a awm laia hmeichhe pakhat a thih avanga lungawi lohna lantirtute leh security force-te inkarah buaina chhuakin, security force-te silai hmehpuahah mi panga an thi.

Kurdistan province aṭanga kal, hmeichhe kum 22 mi, Mahsa Amini chu kar liam ta khan morality police-ten Tehran-ah an man a, police kuta a awm lai hian nikhawhreloa awmin a hnuah a thi a ni. He thil thleng vang hian Iran khawpui bakah ram chhung hmun hrang hrangah lungawi lohna lantir a ni.

Amini-i chenna, Kurdish-a Saqez khawpuia nawrh huaihawtte lam hawia security force-ten silai an hmehpuahah mi pahnih an thi tih Hengaw Human Rights Organization chuan a sawi a, Divandarreh khuaah security force-ten mi pahnih kaphlum bawkin, Dehgolan-ah mi pakhat kahhlum a ni bawk.

Morality police-te hian Islam dana hmeichhiate inchei dan chungchang endiktu leh dan kengkawhtu niin, hmeichhiate chu pawn chhuahnaah an sam khuh bo vek a, thawmhnaw pawh a thawl lam inbel tura tih an ni. Police-te chuan danin an phut angin Amini hi a inchei loh vangin an man a, mahse an kuta a awm lai hian a thi zui ta a ni. He thil thleng chungchanga lungawi lohna lantirna kawng khat, #MahsaAmini chuan Twitter-ah mention vawi maktaduai 2 chuang a nei tawh bawk a ni.