Ram hrang hrangin NKorea chetdan dem
North Korea-in Pathianni-a hydrogen bomb a enchhin chu ram hrang hrangin an sawisel a, NKorea ram hrekna na zawk siam an duh thu an sawi.
North Korea hian Japan ram chungah missile a kahchhuah hnu lawkah hydrogen bomb a enchhin leh a, an enchhinna hi a hlawhtling niin a sawi bawk.
US President Donald Trump chuan kar hmasaa NKorea-in missile a kahchhuah hnuah, NKorea inbiakna neihpui chu thil chinfel theihna a ni lo tih sawiin, NKorea ram chetdan leh ṭawngdan chu US tan ngeiawm leh hlauhawm tak a ni chho zel niin a sawi.
US Treasury Secretary Steve Mnuchin chuan NKorea-in ramdangte nen insumdawnna a neihte dan vek a nih theih nan hrekna thar siam dan tur a ngaihtuah dawn tih a sawi. President Trump pawhin NKorea nena sumdawnna kalpui ramte nena an insumdawnna tihtawp vek dan tur an ngaihtuah dawn tih twitter-ah alo tarlang tawh bawk a ni. Germany Chancellore Angela Merkel leh France President Emmanuel Macron te pawhin EU-in NKorea hrekna a siamte na zawka kalpui an tum thu an sawi a ni.
Britain Prime Minister Theresa May chuan UN Security Council chuan NKorea hrekna thar a ngaihtuah thuai a ṭul thu a sawi. Russia foreign ministry pawhin NKorea thiltih avang chuan a nghawng let na tak a tuar thei a ni tih a sawi a, hemi rual hian boruak duhawm lo zawk a thlen chhoh zel lohna turin ngaihtuahna fim tak hman a, pawngpaw chet lak mai loh a ngai a ni, a ti.
NKorea ram ṭhian ṭha, China pawhin NKorea chu thil dik lo tih chhunzawm zel lo turin a ngen a, NKorea laka UN resolution siam chu a taka akalpui tur thu a sawi. United Nations Secretary General Antonio Guterres pawhin NKorea thiltih dan chu a demt hu a sawi a, hei vang hian nimin khan Security Council chuan emergency meeting a nei nghal a ni. US, Japan, France, Britain leh South Korea chuan North Korea chungchang ngaihtuaha emergency meeting nei tur hian ngenna an thlen a ni.