Coronavirus vanga thi zinga 85% Europe leh US ram mi an ni
Khawvel ram hrang hrangah coronavirus vanga thi chu mi 2,50,000 chuang an tling tawh a, thi zinga 85% zet hi Europe leh US rama mi an ni.
Nikum December thlaa hmuh ṭan, Covid-19 hi mi maktaduai 3.6 chuangin an kai tawh a, khawvel economy pawhin a tuar nasa tawh hle. Hei vang hian ram tam zawkin hri leng vanga kharkhipna leh khuahkhirhna an siamte pawh an thladul ṭan tawh a ni.
Hetih lai hian ram hrang hranga survey neihah, ram tam zawk chuan sorkarin economy aiin mipuite nunna chhanhim chu dah pawimawh zawk se an duh thu an sawi.
Thawhṭanni khan khawvelah hri kai thar hi mi 46,200 an awm a, mi 1,951 in a thihpui bawk. Russia ramah hemi nia hri kai thar awm zat hi 10,580 an tling a ni. US-ah pawh Thawhṭanni khan hri kai thar hi mi 10,000 dawn an tling a, ram hrang hrangah zingah hri kai tamna ber la niin Covid-19 kai hi mi 11,97,900 an awm a ni.
US chu coronavirus vanga thi tamna ber a ni a, mi 69,000 in an thihpui tawh. US president Donald Trump chuan an ramah he hri vanga nunna chan hi mi 7,580 - 1,00,000 vel an tling thei dawn niin a sawi.
Italy chu hri vanga thi tamna ber dawttu a la ni a, Thawhṭanni khan mi 195 thih belh lehin thi zat hi mi 29,079 an tling tawh a ni. UK chu thi tamna ram pathumna niin, mi 28,734 in an thihpui tawh a ni. Spain leh France ramah pawh he hri vanga thi hi mi 25,000 an chuang ve ve tawh bawk.
Kan vaia kan him tlan a ngai : UN chiefUnited Nations secretary-general Antonio Guterres chuan khawvela hripui leng mek dona kawngah ram hrang hrangte ṭanrual leh thawhho a ngaih thu sawiin, 'Kan vaia kan him tlan vek a ngai a ni," a ti.
Covid-19 damdawi siamna tura research neihna atan US dollar tluklehdingawn 8.2 mamawh a nih thu a sawi. Hri leng mek damdawi leh vaccine siamna kawnga ram hrang hrangte thawhhona tihchakna tura siam, April thlaa tlangzarh tak ACT Accelerator chu ṭha a tih thu a sawi bawk.