Myanmar-in Bangladesh ramri bulah rahpuah bomb phum

Myanmar chuan ni thum kalta chhung khan Bangladesh nena an inrina bulah rahpuah bomb a kam nia sawi a ni a, hei hi Bangladesh rama tlanchhia, Rohingya muslim-te an rama an kir leh tur danna atana a tih nia sawi a ni.

Bangladesh chu a ramri bul maia rahpuah bomb kam a nih avang hian a lungawi lo hle a, Myanmar sorkar hnenah complaint pawh thehluh a tum nia sawi a ni. Mynmar hian ramri hung bul, a ram chinah rahpuah bomb hi eng emaw zat a kam nia report a ni. Bomb an kam hi thlalak aṭang leh hrilhtu an awm avanga hria chauh a nih thu Bangladesh chuan a sawi a, bomb kamtute hian uniform an hak leh hak loh erawh a sawilang lo a, mahse Rohingya-te erawh an ni lo tih a sawi.

Myanmar-a Rakhine state-a Rohingya muslinm-te laka tharum thawhna a thlen hnuah mi 400 chuang an thi tawh a, mi 125,000 vel chu Bangalesh ramah an tlanchhe tawh bawk. Rakhine minister for border affairs Phone Tint chuan rahpuah bomb kam nia an puhna chu thu dik lo a nih thu leh, hetiang thil hi an tih loh thu a sawi. Hetih lai hian Bangladesh border guard officer, Manzurul Hassan Khan chuan Thawhlehni khan ramri bul, Myanmar ram chinah thil puak vawi hnih hriat a nih thu a sawi a, Thawhṭanni pawh khan hetiang bawka thil puak ri hi an hriat thu a sawi.

Khan chuan Thawhlehni-a ramri bula thil puak hian mipa naupang pakhat ke a thlawh a, Bangladesh-ah enkawl tura hruai a ni a, midang pakhatin hliam na vak lo a tuar bawk niin a tarlang.

Myanmar rama buaina thleng avang hian Rohingya muslim-te chauh an tlan­chhe lo a, Hindu 500 chuang pawh Bangladesh ramah an lut tawh a ni. Ni nga kalta chhung khan Bangladesh tuipui kamah ruang 53 chu tuiin a lenchhuak a, heng mite hi lawng hmanga Bangladesh-a luh tum, tuipuia chesualte nia rin a ni. Raltlante hian Bangladesh leh Myanmar inkara lui an kalkai a ngaih avangin tuipuiah chesual an awm fo a ni.