US-in thilpek a la dawng zel ang : NKorea
North Korea chuan an ram chu US hnena thilpek dang pe turin a inpeih leh tawh tih sawiin, US chuan thilpek a la dawng leh zel dawn tih a sawi.
UN-a NKorae ambassador Han Tae Song chuan an ram chuan Pathianni khan a ṭum rukna atan hlawhtling takin nuclear bomb a enchhin thu a sawi. Han chuan an ramin mahni invenna tura hma a laknate chu midang tan ni lo, US tana an thilpek a nih thu a sawi. US-in NKorea hrek tura hma a la chhunzawm zel a nih chuan thilpek dang pawh a la dawng zel dawn a ni, a ti.
Hetih lai hian US ambassador Nikki Haley-i chuan NKorea-in nuclear bomb leh missile a enchhin chhunzawm zel chu Kim Jong-un-a’n indo a ngenna a ni tiin a sawi a, UN Security Council-a member 15-te chu Kim dangchat tur leh a sumdawnpuite danna atana hrekna na thei ang ber siam turin a ngen. Pathianni khan NKorea hian hydrogen bomb a enchhin a, satellite image aṭanga a lan danin hydrogen bomb enchhinna, Punggye-ri test site-ah chuan nasa takin lei a min phah a ni.