Brazil president hlui pahnih eiruk thubuai siamsak

Brazil president hlui pahnih Dilma Rousseff-i leh Luiz Inacio Lula da Silva-te chu sorkar hnuia oil firm lian, Petrobas-a eirukna lian tak thlengah inhnamhnawihah puhin thubuai siamsak an ni.

Brazil prosecutor Rodrigo Janot chuan Workers Party member pariatte chu Petrobas-a dik lo taka thiltihna thlengah hian an inhnamhnawih niin a sawi a, an zingah hian Lula leh Rousseff -te hi an tel a ni.

Rouseff-i hi budget dan a lo khawih danglam avangin kum 2016 khan president a nihna aṭangin paihthlak a ni. Rousseff-i hi Lula thlaktu a ni a, Brazil rama hmeichhe president hmasa ber a ni.

Lula hi Brazil-a politician lar ber a la ni reng a, mahse eiruk thubuaiah hian thiam loh chantir a nih chuan kum 2018-a president thlanna neih turah a chuh thei dawn lo a ni.

Workers Party chuan thuchhuah siamin, president hlui pahnihte puhna chu thu dik lo leh belhchian dawl lo a nih thu an sawi a, thubuai chhui mek ṭhenkhat laka aṭanga mipuite rilru lakpen tumna niin a sawi.