Putin-a'n nasa zawka beihpui thlak a tum ; Indonaah sipai nuai 3 tirh belh a tum

Russia president Vladimir Putin chuan Ukraine nena an indo meknaah, sipai chakna hmanga nasa zawka beihpui thlak an tum tih nimin khan a sawi.

Russia-Ukraine indona hi a thla sarihna a ni tawh a, indo tirh lama Russia-in ram a laksakte chu Ukraine lakah an hloh chho leh mek a ni.

Vladimir Putin chuan sipai tihchakna tur, partial mobilisation puangin, indona hmunah sipai reserve nuai 3 vel tirh belh a tum tih official-te chuan an sawi.

Putin chuan Russia-in a ram vawnghim turin a theihna zawng zawngin a bei zel dawn tih chu a kaltlangpui tur thu khaw­thlang ramte a hrilh nghal bawk.

Russia thuneihna hnuaia awm, Ukraine khawchhak leh chhim lama chengte'n Russia rama beh an thlan hnu lawkah he thu hi Putin chuan a sawi a ni.

Putin chuan khawthlang ramte chu “nuclear blackmail” tumah puhin, NATO ram zinga a thuneitu sang lamin Russia tihchhiat tumin nuclear ralthuam hman mai an hreh lo tih ṭawngkamte pawh a hriat thu a sawi.

Putin chuan,"Russia chung­chang a chhe zawnga sawitute hian, kan ramin ralthuam changkang ber leh NATO ramte aia changkang zawk kawng hrang hranga hman mai theih tur kan nei a, Russia dinhmun tiderthawng zawnga chetlakna a awm a nih chuan, Russia leh a mi te venghim turin kan theihna sang ber hmangin kan beilet dawn tih lo hrenawn leh rawh se," a ti.