Pakistan-ah tui hri vanga thi pun belh zel

Pakistan-ah chuan tuilian rapthlak tak an tawrh hunah tui hri a len chhunzawm a, Thawhlehni khan tui hri vangin mi pakua an thih belh leh.

Disaster management agency-in a sawi danin, tuilian vanga an rama chhiatna nasa tak thlengah mi 1,559 an thi a, an zingah hian naupang 551 leh hmeichhia 318 an tel.

Tuilian hian ziaawm lam pan tawh mah se, hmun tam taka tui tlingte a kam fel nan chua thla hnih aṭanga thla ruk vel a duh dawn niin official-te chuan an sawi. Tuilian avang hian tui hrite bakah, malaria, dengue, khawsik, vun leh mit natna leh kawṭhalo hrite a leng mek a ni.

World Health Organization (WHO) chuan hri leng hian chhiatna thawh hnihna a thlen theih thu an sawi. Pakistan planning minister Ahsan Iqbal chuan hri hi a darh mek nia sawiin, an thunun theih loh a hlauhawm tih a sawi bawk.

July 1 aṭanga tulian tawrhna bial hrang hrangah tui hri veite enkawlna turin makeshift/mobile hospital siam a ni a, heng hmunah hian mi maktaduai 2.7 enkawl an ni tawh.

Pakistan hmar lama kumina tuilian rapthlak thleng hian mi makta­duai 33 dawn a nghawng a, chenna in, thlai chinna, lei leh kawng­puite tichhiain, ranvulh tam tak an thi bawk. Tuilianin thil a tihchhiat hi USD tld 30 a tling niin an chhut.

Sorkar chuan chhiatna nasa tak an tawh avangin kum 2022-23 financial year chhungin an GDP chu 5% aṭangin 3%-ah a tlakthlak an rin thu a sawi.