US-ah Covid sum tichingpentu mi ṭhahnem tak thubuai siamsak

United States-a prosecutor-te chuan Covid relief scheme-a sum tichingpentu mi 47-te thubuai an siamsak.

Thubuai siamsakte hi Covid hri len hluar laia sorkarin naupangte enkawlna tura chhawmdawlna programme a siam aṭangin USD maktaduai 250 vel chu an mimal hamṭhatna atana tichingpenah puh a ni. Naupangte ei tur semna atana sum ruahmante chu an mimal thilah te, car leh luxury goods leina atan an hmang nia sawi a ni.

Sum tihchingpennaa bul tumtu berah Minnesota-a non-profit organisation, Feeding Our Future chu puh a ni a, mahse a dintu Alimee Bock chuan tihsual an neih loh thu a sawi thung.

FBI director Christopher Wray chuan inbumna an hmuhchhuah tawh a zawnga lian ber a nih thu a sawi. Dik lo taka thil tia puhte hian dawt hmangin naupangte hnenah ei tur an semna bill-te thehlutin sum hi an lachhuak tih a sawi. Mahse a takah naupang an ṭanpui nia sawite hi an awm lo a ni, a ti.

Sorkarin chhawmdawlna programme a siamah, NGO-te kaltlangin private restaurant-te chuan ei tur semna tur sum hi an dawng thei a, hei vang hian Feeding Our Future-a thawkte hi thamin, distribute site lem ṭhahnem tak an sponsor tir a ni. Ni rei lote chhungin naupang sang tel hnenah ei tur pe ṭhin angin an insawi a, paper-ah naupang hming an phuahchawpte an thehlut a, a ṭhen chu www.listofrandomnames.com aṭanga an lakchhawn a ni. Heng mite hian an sum dawn hi ṭanpuina hna thawhna atan ni loin car bakah US, Kenya leh Turkey-a hmun leina atante an hmang a, an zin kual bawk.

US attorney general Merrick Garland chuan hripui leng, mimal hamṭhatna atan lo hmangtute chu DoJ chuan a dapchhuak zel dawn tih a sawi.