Sri Lanka-ah curfew bawhchhia Mi 46,000 chuang man an ni

Sri Lanka police-te chuan Covid-19 vanga ram chhunga curfew puan bawhchhia mi 46,284-te chu an man tih an tarlang. 

March 20 aṭang khan Sri Lanka-ah hian curfew puan a ni a, heng mi an man te hian vantlang hmuna zu lei tura an chhuah avang te, restaurant la hawng lui te, lirthei tlan chhuak te leh teihawi mai maia la chhuak luite an ni tih police-te chuan an tarlang bawk.

Police ten lirthei an man tawh zat hi March 20 aṭang khan 12,000 chuang a tling tawh a ni. Sri Lanka-ah hian curfew hi puan ni mah se, hri darh tlemna leh a ziaawmna hmun district ṭhenkhat chu thlahdul a ni.

Sri Lanka-ah hian Covid-19 hri kai hi mi 755 an tling tawh, heng zinga mi 194-te chu enkawl dam an ni tawh a, thi hi mi pariat an awm tawh bawk a ni. Sri Lanka khawpui Colombo bakah hian Gampaha leh Kalutara khua chu hri darh nasatna khuate an ni.