Hurricane Irma-in Carribean-ah chhiatna nasa tak thlen

Atlantic Ocean aṭanga thlipui tleh na ber, Hurricane Irma chuan Carribean thliarkar a nuai a, chhiat­na nasa tak a thlen. Thlipui hian Puerto Rico, Dominican Republic, Haiti leh Cuba a pan leh a, US-a Florida state lamah a tleh chhunzawm rin a ni bawk.

Hurricane Irma tleh avang hian Saint Barthelemy leh Saint Martin thliarkarah mi paruk an thi a, mi dang pahnihin hliam na tak an tuar. Thlipui tleh hian chenna-in tam tak a lenchhia a, ruahtui a pai tel avangin khawpui chhungte tuilian­in a chim bawk. Heng thliarkar pahnihte dinhmun hi a ṭha lo hle a, tui leh electricity supply a chhia a, public buildingte a hman theih lo a, St Martin-ah chuan chennain 70% vel thlipui hian a nuai chhia nia sawi a ni.

Category Five Hurricane Irma hi Caribbean-ah hian darkar khata km 294-a nain a tleh a ni. Thlipui a tleh dawn avang hian US President Donald Trump chuan Florida, Puerto Rico leh US Virgin Islands-ahte emergency a lo puang lawk tawh a, Bahamas thuneitute pawhin chhimlam thliarkar paruka chengte chu hmun him lamah sawnchhuah an nih tur thu an sawi.