Pope Francis-a’n Colombia ram a tlawh

Roman Catholic kohhran hotu, Pope Francis chu Colombia ramah a zin a, Pope atana lakluh a nih hnua foreign trip a neih ṭum 20-na leh, Latin America a tlawh ṭum nga-na a ni. Kum 1986 hnua Pope-in Colombia ram a tlawh lehna hmasa ber a ni bawk.

Pope thlawhtheihna, Alitalia jet chu Bogota bula El Dorado International Airport bulah a ṭum a, Colombia President Juan Manuel Santos leh a nupui Maria Clemencia bakah Bogota-a Vatican aiawh, Ettore Balestrero-te’n an lo hmuak a ni.

Colombia President hian an rama helpawlte inremna siampui tumin theih­tawpin hma a la a, kum 52 chuang zet sorkar laka lo hel tawh FARC-te chu inremna thuthlung a ziahpui tawh a, helpawl dang­te pawh inremna siampui tumin hma a la chhunzawm mek bawk. Pope Francis chuan President Santos-a’n inremna zawnga hma a lakna hi a thlawp hle a ni.

Colombia hi khawvela Roman Catholic tamna ram pathumna a ni a, Pope hian a hma pawhin tlawh a duh tawh hle a, mahse Colombia sorkar leh FARC-te’n inremna tluantling an siam hun hi a nghak niin, Vatican thupuangtu chuan a sawi.

Nimin khan Pope hian sorkar official leh civil society group-te meeting a neihpui a, outdoor Mass a buatsaih bawk. Vawiin hian Meta pro­vince khawpui, Villavicnecia a tlawh ang a, Mass a buatsaih bawk ang. Inrinni-ah Medellin-ah kalin ṭhalai rualte a hmu dawn a, Olayaa Herrera international airport-ah Mass a buatsaih nghal dawn bawk a ni. He hmunah hian mi maktaduai khat dawn an leng thei dawn nia sawi a ni.