Catalonia-in October 1-ah independence vote la dawn

Catalonia parliament chuan Spain aṭanga independence puan duh leh duh loh chungchangah October 1-a mipuite vote lakna tur, referendum bill a pass.

Catalonia parliament hi independence duhtu party-te’n an thunun a, referendum bill ngaihtuahnaah hian a thlawp lamah vote 72 a tla a, member 112 an hai thung. Independence duhlotu lam te chuan vote lak hma hian chamber an chhuahsan a ni.

Referendum bill pass a nih hnu hian inlakhran duhtu lam pawl chuan lawmin, an bial hnam hla ‘Els Segadors’ an sa zui a ni. Hetih lai hian bill thlawp lotu, conservative Popular Party chuan inlakhran duhtu politician-te chu Spain buaina thlen duhah an puh thung.

Catalonia bialah hian mipui maktaduai 7.5 awmin ṭawng hrang leh culture hrang an nei a, Spain ram leilung hausakna tam tak chu Catalonia bialah hian a awm a ni. Spain ram economy tan pawh a pawimawh hle bawk.

Spain sorkar laipui chuan Catalonia inlakhran hi a remti lo a, Spanish Constitutional Court pawhin Catalonia parliament bill pass hi a ennawn a, a hnawl sak rin a ni bawk. A hma pawhin a lo hnawlsak tawh a ni. Prime Minsiter Mariano Rajouy pawhin an ram economy tana pawimawh tak, Catalonia bial indan hi an remti dawn lo tih a sawi. PM chuan, Spain ram danpui hnuaiah inlakhran tur chungchanga mipui ngaihdan lak hi bial khat chhung­ah chuah neih phal a ni lo a, ram pum huap chauha neih theih a ni. Hei vang hian Article 155 hnuaiah Spain sorkar chu Cataloni regional sorkar inrelbawlna kawngah inrawlhin, vote lak tur pawh a ṭhulhtir thei a ni, a ti.