Mexico-ah magnitude 8-a nain lir a nghing

Mexico chhim lamah Ningani zan khan magnitude 8-a nain lir a nghing a, kum 1985 hnua Mexico rama lir a nghin nat ber ṭum a ni.

Lirnghingin chhiatna hrang hrang a thlenah mi pang an thi a, chenna-in tam tak a tichhe bawk. President Enrique Pena Nieto chuan mi maktaduai 50 velin lirnghing hi an hria niin a sawi a, thi zat pawh hi an la punchhoh a rinawm thu a sawi. Magnitude 8-a naa lir a nghin hnu hian aftershock ṭum 10 chuang awm leh a, hengte hi magnitude 4.3 - 5.7 a nate an ni.

Lir nghin ṭanna hi Mexico chhimthlan lam, Pijijiapan khua aṭanga km 123 vela hla, lei hnuai km 33 vela thuk a nih thu, US Geological Survey (USGS) chuan a tarlang. Lirnghing hi a nat em avangin mi tam tak chu in aṭangin an tlanchhuak a, kawtthlerah khua an nghak var a ni. Mexico City hmun ṭhenkhat chuan electric suppy an nei lo bawk.

US Tsunami Warning System chuan lirnghing hian tuifawn meter 2.3 vela sang a siam a, Pacific tuifinriat kama awm, Mexico, Guatemala, El Salvador, Costa Rica, Nicaragua, Panama, Honduras leh Ecuador-ahte tsunami a thlen a hlauhthawnawm niin a sawi bawk.